यस्तो योजनामा एक ट्रिलियन डलरभन्दा बढी खर्च लाग्नेछ। यो विवादास्पद प्रस्ताव उनले अमेरिकी राष्ट्रपतिको कार्यकालको मध्यतिर आयोजित पार्टीको पहिलो विशेष सम्मेलनमा दिएको भाषणमा गरेका हुन्।
उनले यो योजना कसरी कार्यान्वयन हुनेछ वा यसका लागि आवश्यक रकम कहाँबाट आउनेछ भन्नेबारे कुनै विवरण दिएनन्; उनले केवल यति भने कि उक्त रकम अमेरिकाभित्रै खर्च गर्नुपर्नेछ।
डेमोक्र्याटहरूले तुरुन्तै यसलाई “खोक्रो वाचा” को संज्ञा दिए भने अन्यले यस्तो प्रतिबद्धता कानुनी रूपमा वैध छ कि छैन भनेर प्रश्न उठाए। अमेरिकामा करिब २७ करोड वयस्क नागरिक छन्, जसको अर्थ ५,००० डलरको भुक्तानी गर्दा अमेरिकी सरकारलाई करिब १.३ ट्रिलियन डलर खर्च लाग्नेछ।
विशेष गरी अमेरिकामा मूल्यवृद्धि भइरहेको बेला उनको योजना सम्भव छ कि छैन भन्नेबारे प्रश्नहरू उठ्न थालेका छन्; यो मूल्यवृद्धिको एउटा कारण फेब्रुअरीमा अमेरिका र इजरायलले इरानविरुद्ध सुरु गरेको युद्धको परिणाम पनि हो।
इरानको जवाफी कारबाहीमा खाडी क्षेत्रमा रहेका अमेरिकी सैन्य अखडा र सहयोगीहरू माथिका आक्रमणहरू समावेश छन् तर सबैभन्दा महत्त्वपूर्ण कुरा त उसले ‘स्ट्रेट अफ हर्मुज’ (हर्मुज जलसन्धि) लाई ठूलो हदसम्म बन्द गरिदिएको छ, जहाँबाट विश्वको करिब एक-पाँचौँ भाग तेल र तरल प्राकृतिक ग्यासको ढुवानी हुने गर्थ्यो।यस अवरोधका कारण विश्वभर तेलको मूल्यमा उतारचढाव आएको छ र ट्रम्पले युद्ध अन्त्य गर्न आफ्नै पार्टीभित्रबाट दबाबको सामना गरिरहेका छन्।
२०८३ भदाै २४ गते बुधबार अमेरिकी राष्ट्रपतिले चेतावनी दिँदै मध्यावधि निर्वाचन नभएसम्म यो युद्ध अन्त्य नहुने र तबसम्म तेलको मूल्य पनि नघट्ने बताएका छन्। उनले टेक्सासको एउटा सम्मेलनमा सम्बोधन गर्नु अघि यी टिप्पणीहरू गरेका थिए। सोही सम्मेलनमा उनले तेहरान (इरान) लाई आणविक हतियार विकास गर्नबाट रोक्नका लागि अल्पकालीन आर्थिक कठिनाइ सहनु उचित हुने तर्क गरे।
डलास, टेक्सासमा आयोजित रिपब्लिकन सम्मेलनमा ट्रम्पको लामो सम्बोधनले द्वन्द्वको मुख्य पक्ष, अमेरिकीहरूको जीवनस्तरमा पर्ने प्रभाव, लाई समेटेकाे थियाे। साथै, उनीहरूको खर्च गर्ने क्षमता बढाउने उनको प्रतिबद्धताले हलमा उपस्थित मानिसहरूबाट जोडदार ताली पाएका थिए ।
ट्रम्पले भने, “यदि रिपब्लिकनहरूले ‘हाउस अफ रिप्रेजेन्टेटिभ्स’ (तल्लो सदन) र ‘युनाइटेड स्टेट्स सिनेट’ (माथिल्लो सदन) दुवैमा जित हासिल गरे भने म संयुक्त राज्य अमेरिकाका प्रत्येक वयस्क नागरिकलाई ५,००० डलरको रकम (लाभांश) प्रदान गर्नेछु, हामी चाहँदैनौँ कि तपाईंहरू त्यो पैसा खर्च गर्न क्यानडा जानुहोस्। हामी चाहँदैनौँ कि तपाईंहरू चीन वा जर्मनी जानुहोस्। तपाईंहरूले त्यो पैसा संयुक्त राज्य अमेरिकामै खर्च गर्नुपर्छ।”
यद्यपि, यो खर्चको अनुगमन कसरी गरिनेछ भन्ने कुरा भने स्पष्ट छैन। ट्रम्पले यस्तो रकम वितरणको वाचा गरेको यो पहिलो पटक भने होइन, यसअघि उनले भन्सार महसुलबाट प्राप्त हुने राजस्वमार्फत २,००० डलरको चेक वितरण गर्ने प्रस्ताव गरेका थिए।
