काभ्रे, १८ साउन । काभ्रेको बनेपा नगरपालिका–६ बुडोलडाँडास्थित एक सेकुवा कर्नरमा जुवातास खेलिरहेको अवस्थामा प्रहरीले सञ्चालकसहित सात जनालाई पक्राउ गरेको छ।
प्रहरीका अनुसार सिन्धुपाल्चोक घर भएका २४ वर्षीय सन्तोष तिमिल्सिनाले सञ्चालन गर्दै आएको ‘हाईवे सेकुवा कर्नर’मा जुवातास खेलिरहेको सूचनाका आधारमा आइतबार साँझ छापा मारिएको थियो।
इलाका प्रहरी कार्यालय बनेपाबाट खटिएको टोलीले जुवातास खेलिरहेका सञ्चालक तिमिल्सिनासहित सात जनालाई नियन्त्रणमा लिएको हो। उनीहरूको साथबाट नगद ९० हजार ३४५ रुपैयाँ र एक बुक ताससमेत बरामद गरिएको प्रहरीले जनाएको छ।
पक्राउ परेकाहरूलाई नियन्त्रणमा राखेर घटनासम्बन्धी थप अनुसन्धान तथा कानुनी कारबाही अगाडि बढाइएको प्रहरीले जनाएको छ।
