काठमाडौँ, १३ असार (रासस) : प्रधानसेनापति प्रभुराम शर्मा र संयुक्त राष्ट्रसङ्घको शान्ति कार्य विभाग हेर्ने उपमहासचिव जाँ-पीय ल्याक्ख्वाबीच २०८० असार १२ गते भेटवार्ता भएको छ ।
सैनिक मुख्यालय जङ्गी अड्डामा भएको शिष्टाचार भेटमा उहाँहरूबीच दुई पक्षीय चासो र आपसी हितका विषयमा विचारविमर्श भएको सैनिक जनसम्पर्क तथा सूचना निर्देशनालयले जनाएको छ ।
नेपालको चार दिने भ्रमणमा आउनुभएका उपमहासचिव ल्याक्ख्वालाई उपरथी योगराज शर्मा र परराष्ट्र मन्त्रालयका प्रतिनिधिले त्रिभुवन अन्तर्राष्ट्रिय विमानस्थलमा स्वागत अभिवादन गर्नुभएको थियो ।
प्रधानसेनापति शर्मासँग नेपालका लागि म्यानमारका गैरआवासीय सैनिक सहचारी सहायकरथी ये टुट्ले असार १२ गते नै शिष्टाचार भेटघाट गर्नुभएको निर्देशनालयले जनाएको छ ।
(तस्बिर : प्रधान सेनापति प्रभुराम शर्मासँग २०८० असार १२ गते मङ्गलबार जङ्गी अड्डामा संयुक्त राष्ट्रसंघको शान्ति कार्य विभाग हेर्ने उपमहासचिव जिन–पियरे ल्याक्रोइक्सले शिष्टाचार भेटवार्ता गर्नुहुँदै । तस्बिर सौजन्य : नेपाली सेना/रासस)
