काठमाडौँ, १० जेठ। नेपाल कम्युनिस्ट पार्टीको केन्द्रीय सदस्य बनिसकेका साध्यबहादुर भण्डारीको नाम अन्तिम समयमा आएर फालिनुमा नारायणकाजी श्रेष्ठको हात रहेको एमाले निकट उच्च स्रोतले जनायो ।
नारायणकाजी श्रेष्ठको नेतृत्वमा माओवादीसँग एकता गर्ने बेलामा पनि साध्यबहादुर भण्डारी र भरत दाहाललाई कार्वाही गरी निश्कासन गरेर एकता गरिएको थियो ।
पाकिस्तानी राजदूतावास, भारतीय राजदूतावास र नेपाली सेनाको गुप्तचर विभाग डीएमआईको पैसा भण्डारीले खाने गरेको नारायणकाजी श्रेष्ठको त्यतिवेलाको आरोप थियो । राष्ट्रवादको झण्डा बोकेर भारतीय राजदूतावासलाई भण्डारीले सूचना दिने गरेको श्रेष्ठको दावी थियो ।
माओवादीबाट विद्रोह गरे निश्कासन गरेका पुन्य गौतम ‘विश्वास’लाई पनि श्रेष्ठकै आग्रहमा हटाइएको एमाले शीर्ष नेताले बताएका छन् ।
‘हामी माओवादीको सिङ्गो शक्तिलाई चिढाएर उनीहरुलाई केन्द्रीय सदस्य बनाइरहने जोखिम मोल्न सकेनौं । पहिला एमालेमा काम गरेका धेरै अनुभवी, इमान्दार नेताहरुलाई समेट्ने समस्या पनि भएकाले नारायणकाजी कमरेडहरुको प्रस्तावलाई सहजै स्वीकार ग¥यौं’, उक्त स्रोतको दावी छ ।
