काठमाडौं । नेपाल–चीनतर्फको रसुवागढी नाका पूर्ण रूपमा सञ्चालन गर्न चीनले आनाकानी गरेको छ । नेपाली कामदारलाई कोरोना संक्रमण देखिएपछि त्यसलाई देखाउँदै गत भदौ १७ देखि बन्द रहेको नाका पूर्ण रूपमा सञ्चालन गर्न चीनले आनाकानी गरेको हो ।
बुधबार (०७७ असोज ७ गते) एक कन्टेनर स्वास्थ्य सामग्री छाडे पनि पूर्ण सञ्चालन गर्न अर्घेल्याइँ गरिरहेकाे छ ।
कोरोनाको कारण देखाउँदै चीनले नेपालतर्फका मुख्य नाका बन्द गरिदिएपछि दसैंको मुखमा झण्डै १ हजार मालबाहक गाडी रोकिएको व्यापारीको भनाइ छ । अड्किएका ट्रकमा तयारी पोशाक (गार्मेन्ट), बीउ बीजन, फलफूल, खाद्यान्न, औद्योगिक कच्चा पदार्थ, कस्मेटिक सामान, दूरसञ्चार, हाइड्रोलगायतका निर्माण सामग्री छन् । फलफूल र खाद्यान्न सड्ने अवस्थामा पुगेका छन् भने निर्माण सामग्री रोकिँदा विकास निर्माण प्रभावित भएको छ ।
भारततर्फबाट निर्वाध रूपमा आयात भइरहे पनि चीनले भने कोरोनालाई बहाना बनाउँदै बिहीबारदेखि दैनिक ५ वटा मात्र ट्रक मात्र छाड्ने निर्णय गरेको छ । दैनिक ५ वटा ट्रक मात्रै छाडेमा त्यहाँ अहिले अड्किएका १ हजार ट्रक नेपाल भित्रिन साढे ६ महिना अर्थात् २ सय दिन लाग्नेछ ।
चीनको नियतमाथि व्यापारीको प्रश्न
गत जनवरीमा चीनको वुहानलमा कोरोना संक्रमण फैलिएपछि अमेरिका, बेलायत, अस्ट्रेलियालगायतका देशले हवाई उडानसँगै व्यापारिक सम्बन्ध विच्छेद गरेका थिए । चीनबाट संक्रमण फैलिन सक्ने त्रासपछि ती देशले यस्तो निर्णय लिएका थिए । संकटका बेला मित्र राष्ट्रहरूले असहयोग गरेको भन्दै चीनले उतिबेला चित्त दुखाएको थियो ।
चीनसँग सीमा जोडिएको नेपाल यतिबेला कोरोनाको चपेटामा छ । विगतमा नेपालले जस्तै संकट भोगेको थियो चीनले । अहिले उसैले नेपालतर्फको दुवै नाका बन्द गरेको छ । यसले चीनको नियतमाथि नै प्रश्न उठेको व्यापारी बताउँछन् । ‘एकातिर कोरोना भन्ने अर्कातिर ५ कन्टेनर छाड्नचाहिँ राजी हुने चीनको निर्णयले उसको नियतमाथि नै प्रश्न उठेको छ,’ एक व्यापारीले भने ।
भन्सारका हाकिम अनलाइन कक्षामा मग्न
सीमा नाकामा आफ्ना देशका व्यापारीको सामान रोकिएपछि सहजीकरण गरेर त्यसलाई भित्राउने दायित्व भन्सार विभागको हो । तर भन्सार विभागले योबीचमा कुनै ठोस प्रयास गरेको छैन ।
भन्सार विभागको महानिर्देशकका हैसियतमा छन्, सुमन दाहाल । नेपाली व्यापारीका सामान चिनियाँ नाकामा रोकिए पनि उनी कानमा तेल हालेर बसेका छन् । स्रोतका अनुसार महानिर्देशक दाहाल जापानको अनलाइन कक्षामा व्यस्त हुने गरेका छन् ।
एक हप्ताभित्र नाका सहज : मन्त्री ज्ञवाली
परराष्ट्रमन्त्री प्रदीप ज्ञवाली रसुवागढीस्थित केरुङ नाका एक हप्ताभित्र सहज गर्ने गरी दुई देशबीच सहमति भएको बताउँछन् । निरन्तर कूटनीतिक संवादमार्फत नाका समस्याको समाधान गरिएको उनको दाबी छ ।
उनका अनुसार बुधबार पहिलो पटक बिसिजीलगायत अत्यावश्यक खोपसहित अन्य औषधिजन्य सामग्री नेपाली भूमिमा प्रवेश गरिसकेका छन् । “केही दिनदेखि ढुवानीमा समस्या भए । त्यसले नेपालीको ठूलो लगानी फसिरहेको छ, चाडपर्वका बखत अत्यावश्यक वस्तु आउन नपाउँदा बजारमा अभाव खड्किरहेको छ”, मन्त्री ज्ञवालीले भने ।
