काभ्रेपलाञ्चोक, ८ फागुन : नेकपा एकीकृत समाजवादी पार्टीका पोलिटब्युराे सदस्य विदुर सापकोटाको निधन भएको छ ।
मृर्गौलासम्बन्धी रोगबाट पीडित ५८ वर्षीय सापकोटाको उपचारका क्रममा आज बिहान ३:४५ बजे चाबहिलको हेल्पिङह्यान्ड अस्पतालमा निधन भएको हो ।
उहाँले तत्कालीन पञ्चायती शासन विरुद्धको संघर्ष, मालेकालमा भूमिगत, विद्यार्थी राजनीति मार्फत २०४६ सालको प्रथम जनआन्दोलनमा महत्वपूर्ण भूमिका समेत खेल्नु भएको थियो ।
तत्कालीन नेकपा एमालेको लामो समयसम्म सचिवको जिम्मेवारीमा रहनुभएको उहाँले २०७० सालको संविधानसभा निर्वाचनमा काभ्रेबाट चुनिनुभएको थियो । पछि नेकपा एमाले विभाजन भई एकीकृत समाजवादीमा जानुभएको उहाँ पोलिटब्युरो सदस्य हुनुहुन्थ्यो ।
उहाँको पार्थिव शरीर श्रद्धाञ्जलीका लागि पार्टीको केन्द्रीय कार्यालय आलोकनगरमा बिहान ८ बजे देखि १० बजेसम्म राखेर आजै पशुपति आर्यघाटमा अन्त्येष्टि गरिने जनाइएको छ ।
